Lempahe Unang- Bapadah


Sekitar jam lapan alamp  Pak Andon udah sampe agi ka rumah. Tiga anaknya dah barangkat sakolah. Pintu talobo nana di kauti. We Andon nana ka uma. Tubuhnya dingin angat. Kapala ngalukng. Masih  babarikng  ka tampat tidur. Tidur bakubu'. Kubu'nya pun dah ada nang rojek.

" Diahe ga kao nian dongo ge ahe" Jakata Pak Andon ka bininya. Ia ngarasa ka kaning man kokotnya memang angat. 

" Mao makatn ahe kao, nian dah jam lapan lewat makatn boh. Gali uga kao kana Covid. Aku na masalah urakng ka kampokng man petugas kesehatan koa nang ana hiboh" Jakata Andon.

Maklum panyakit nian batol-batol magalii. Nana baya batamu  man dangan. Nana baya bakomo. Nang masok kampokng di samporot. Nang tuha nang paling bahaya. Masyarakat susah , pamarentah susah dinya. Ngalukng kapala. Ka Jakarta nauan bahkan nang Nana kana  covid di padah kana. Nang mati ina sabebet dingovid. Padahal rongkonya nana kana covid.  Tampat kuburan panuh. Dah miah  abut ampeatn ari.

" Aku dipanjoatatn bubur maan, nana nyaman nasi ka molotku" kata bininya saat ia dingatati nasi.

Akhirnya Pak Andon ampus agi ka dapur, pamakanan nang koa akhirnya ia nang makatn. Bubur pun dah masak. Ia mare gare, bawang, man micin sabebet. Ia mare dua buah talo manok  ka bubur koa. Ia Ngantat.  Ia nyoapi we Andon sasendok sasendok. Ia nele muha bininya. Atinya nangis tapi  aii mata nana kaluar ka  matanya. Pak Andon marasa basalah, marasa badosa. Dah dua puluh tahutn panganten nape ba ahe-ahe nana lea dangan saparayungannya. Rumah dah gagas, ba motor, ba oto. Suka ampus ka kea kanaun. Muha  bini ayukngnya ba pupur,  ba bincu,  ba tatok buuk. Ia heran ka dirinya bakaraja rajin tapi masih kodo saranta.  Anaknya ja mao minta Hp nana mampu ia baliatn makanya mao bajuam tanah akhirnya dibare pinjaman.

Masalah minjam nian nang manjoat atinya bukak.  Saat mao berencana  nyual tanah nana barunding man bininya. Mao dibare nauan kaadaan nana pas. Kade ditunda ana tiba-tiba  nauan babaro bininya. Pane nang bakalahi. Lama ia mikirinya. 

Nana tarasa dah satangah mangkok  koa bubur  abis,  sasoap, sasoap ia nyoapi we Andon pake sendok. Pas bini nya nyoap agi ia ngidung bininya. Antah diahe ia ngidung agi, ngidung agi. Dari kaning, ka idung, ka tarenyekng, ka kaning agi. Bininya diam maan.

" Maaf sidi boh ka kao, dah dua puluh tahun labih diri panganten aku nape mare kao karepoatn. Ka uma kana kauma. Kamae ampus bajalatn paha. Dangan makatn ba dageng. Diri ba lisip, ba ka petek, ba daukng gala tutuk, ba pakatikng, ba tampilan, ba lelang,ba tikuyung, ba paku, ba lamidikng   ba kaho. Antah kamile Jubata nele ngedokng ka diri nian" Jakata Pak Andon ka bininya 

" Ngahe kao mareco nian, kurang ahe diri badua karaja, memang nape barajaki, nang penting basehatatn. Ame kao pikiri sae nauan anak diri batiga koa barajaki idupnya, nyaman uga ana diri badua" Jakata we Andon.

" Tarima kasih boh kao ngarati kadaaan nian" Lalu nyagidung  agi koa bininya. Nyangoho. Bininya pun ngidung man ngoho ka Pak Andon. Untung bubur man dua ege talo manok koa dah abis. Ia badua hanya bisa bakoho soalnya we Andon masih rongko.

Sambil ba koho Pak Andon masih nana tanang uga. Duit nang ka salepe nape ia padah ka Bininya. Kade di padah bisa bera we Andon. Nana di padah ana tersinggung lalu aya uga  beranya kade nauan balakangan ari. Dalam ati arus di bare nauan. Ahe pun arus di tarima. Nyangidung agi koa bininya. Bininya pun ngidung ia uga. 

Bininya ngidung mare Pak Andon tanang. Tatap basumangat idup. Nana minder, nana putus asa. Pak Andon ngidung bininya nang nian supaya nana bera kade dibare  nauan. Baidung babeda tujuan.

" Aku mao mare nauan ka kao we Andona, tadi aku ampus ka tampat abang, mao madah ia mali tanah diri ka Lambu naun. Abang baii malinya. Ia minjami ja. Ka salepe nauan ada sapuluh juta. Aku berencana mali Hp untuh Untuh man motor  bakas. Biar kamuda batiga koa ba motor ampus pulakng sakolah" Jakata Andon ka bininya aga gali. Gali bininya bera.

" Tasarah kao, mae baiknya untuk anak diri batiga. Aku mikiri Untuh ba pinta Hp. Ada duit sabebet tapi nang koa untuk adiknya babalak. Kamile diri mampu mulangan  duit koa,  nana mungkin langsung dipulangan  paling di cicil"  jawab bininya. 

Pak Andon pun tanang. Sete dah laka. Masih ada anaknya Udo nang nape nauan. Lempahe pun Udo dah aya. Ia arus uga dibare nauan. Nunggu malam ana saat bakomo makatn  Pak Andon mao mare nauan ka Anaknya Untuh. Tapi lempahe  ka Untuh man nang bungsu? Kade hanya abangnya nang di bare nauan nang badua lempahe? 

Nana tarasa dah naik mataari. Keto man buria mangka karea. Binau  tarabakng ba putar-putar ka atas kampokng Mantonyek.  Makin  sidi tingi. Ba putar-putar manok nyosok ka babah pante.

(Basambung)
Next Post Previous Post
No Comment
Add Comment
comment url