Lempahe Unang-Mali Bontonya Motor

Laka ba subur  ia kakoa atakng agi  ka rumah nang dah nana. Nang ngikuti cara lama tatap atakng. Paku nang ka mangkok ditaap santuhatn  ka kaning. Laka koa nang mao langsung pulakng, mao mani, mao nyocok tasarah ka nang pulakng ba subur. Nang megang kebiasaan are laka ia nyantuh kaning ba paku langsung bagago daukng limo. Nana pulakng ka rumah. Dah namu daukng limo ampus ka tapiatn  mani. Baru koa pulakng.

Nang nana ngikuti kabiasaan  urakng are pulakng mani ka rumah. Ada nang mani ka tapiatn. Ia nang milih na arus ka rumah nang dah nana tadi. 

Pak Andon agak susah milihnya. Ia mao na mao tatap atakng ka rumah nang dah nana koa. Paling ina ia nauan kadaan kaluarga nang dah nana. Laka koa ia pun nana pulakng doho ka rumah. Ia mali sabun ka toko. Sabun Cap kokot. Ia mani ba sabun laka koa pulakng. Batol uga dalam ati na ene are nana pulakng doho jukut ga kotor, batanah-tanah. Zaman are antara manusia man antu nana ba jarak. Gali antu nunaan  makanya mani ba daukng limo.

Pak Andon dah ka rumah agi. Ia makatn alamp,  laka koa ia ngetong duit masih ada 8 juta. Ia dah nana bagunselah. Motor Pak Santo  nang ia mao Bali. Manyak nang arus dibaiki man diganti. Nana ahe nang penting masennya masih gagas. Ia pun nyincakng duit nang ada ka salepenya. 

Pak Andon narodok pintu sami. Pas nang mukaii Pak Santo. " Ahe ga tiulu nian. Tama. Mao nyocok ahe" Ja kata Pak Santo.

"Tarima kasih, tasarah kopi mulih, teh mulih, aii putih pun mulih" Jakata Pak Andon. Ia duduk ngadap TV nang ukurannya aya sidi. Kalah aya lamari ka rumahnya. Karusinya nyaman sidi nudukkinya lamut. Ada ba busa ka dalam. Kade kantut nana ba bunyi. Repo memang kade jadi urakng kaya lea Pak Santo nian.

" Lempahe ari koa tak menak pulakng jam sangahe dari  pinyuh" tanya Pak Santo sambil ia megang remot tv ngeneki bunyinya.

 

" Lama uga dah agak gumare uga koa kami atakng" Jawab Pak Andon

" Janya Pak Santoa sidi minta maaf nian boh. Aku mao batanya, Motor kita nang nana dipake naun mao dijual na. Kade mao dijual sangahe mare raga ka aku" tanya Pak Andon.

" Bonto Motor naun ari  koa diminta di dangan laku basinya baya dikiloii. Di nawar sajuta nana aku bareaatn  koa Motor kenangan jaman aku susah dee. Kao malia ia untuk ahe ba Pak Andon " Pak Santo nang ampeatn batanya.

" Kade kita mao nyualnya aku mao malinya. Ana aku baiki untuk na kamenakatn. Aku nele motor nauan masih edo masennya"  Kata pak Andon.

" Kao nian bamacam, bonto motor mao dibali. Mahal maiki ia nauan. Ban luar man baladarnya diganti. Olinya diganti, busi diganti. Manyak nang arus diganti. Nape agi ana mayar tukang baiki" kata Pak Santo 

" Na ahe ba, ana aku ngago dangan maikinya. Sangahe unang" Jakata Pak Andon agi. 

" Janya maan, koa motor ba sejarah boh. Incakng maan nana usah di bayar. Nang penting ananya ame dijual ka dangan"  jawab Pak Santo. 

Pak Andon tatap maksa Pak Santo nyabut raga. Pak Santo tatap baii mare raga. Malah ia maba Pak Andon ka samping nele motor koa. Kuncinya masih bagantukng.  Pak Santo nyorong  motor ka arah luar. Barat dah rusak bannya. 

 Pak Andon naap duit ka salepenya. Ia naap satangah juta langsung ia namaan ka silawar Pak Santo. Pak Santo ngaluasatn agi ia mareaan ka Pak Andon. Pak Andon pun lekoa uga. Babare-bare, batolak-tolak. Akhirnya Pak Santo naap uga demi harga diri Pak Andon.

Ba paluh memeh Pak Andon ngorong  bonto motor koa. Sampe ka botangnya dah sengat-sengat. 

" Gajah jadi ge kao mali motor koa, samoga duit diri cukup maiki koa motor. Ka sae maikinya koa. Nana bisa koa di antat ka bengkel. Urakng bengkel nang atakng ka keatn "   Ja we Andon sambil ia mantalas Antilikng. Ari nian nana bakaumaan dangan makanya Ia sampat mantalas. 

"Samoga cukup, bisa idup man bisa di pake, bamangi maan " Jakata Pak Andon. Ia ragot-ragot nyocok  aii putih. 

Udo, Untuh man nang bungsu kaluas nele bonto motor koa, ditele  dipegang . Koa tingkah ia batiga. Dari muhanya batiga sidi repo biar pun mali bonto motor. Nana lama agi dah ba Motor ana ampus ka Sakolah.

Pak Andon ba pikir milih tiga dama nang ana mao maiki bonto motornya. Kade tukang atakng ka rumah pasti mahal, kade diantat ka sempang pake oto mahal sewanya . Ase lekoa  di seret maan. Tapi kade diseret ana pelaknya rusak. Nape agi dangan tele baseret  motor rusak. Tapi kade nana di seret baulakng-ulakng uga babali nian  ba bali naun. Tapi kade ka bengkel koa urusan urakng bengkel. "Sumput sidi nian" dalam atinya.

(Basambung)