Lempahe Unang- Nana namui Dayak

Sei Pinyuh alamp nian sidi rami. Naik matari badakah nang atakng. Dari mae-mae urakng ba atangan. Ada nang babali baju,alat motor, ampahatn, baju, Pokoknya macam-macamlah. Pak Andon man Untuh mali Hp. Ada sajam labih ia menak ka toko Hp koa. Nang ampu toko HP man urakng nang karaja ba ia buke Dayak.

Abis mali Hp Pak Andon maba Untuh bagago ampahatn. Bagago  kopi man gula, limo man sabun Cap kokot. Ka pinyuh murah ka kampokng mahal. Pas ka pinyuh wajar babalanja manyak. Sakali-sakali mulih malanja manyak. Cuma Pak Andon  heran sidi samua ampu toko urakng Sobat, kade pun ada malayu man padang. Dayak antah kamae.  Dua puluh tahutn dee ia man bininya ka pinyuh pas laka panganten nana barubah. Ia nape namu urakng Dayak nang batoko ka Pinyuh.

Laka ba belanja Pak Andon maba Untuh  singah ka tampat makatn. Ka dikoa dah rami dangan. Ia menak masatn nasi campur man  esteh manse. Ternyata nang manyak makatn ka warong koa Dayak samua. Warongnya, warong Sobat nang tama makatn urakng Dayak. Untuh diam-diam ba pikir ngahe bisa lalian.Mungkin ada warong urakng Dayak tapi nana naun dimae. Saaya nian Pinyuh nana mungkin Urakng Dayak nana ba toko nana ba warong.

Salama  nunggu pamakanan nang dimasatn manyak urakng Dayak nang masih ba bahasa diri Dayak. Makatn ia kakoa baromong bahasa Dayak. Tapi ada kamuda dara dah mulaii bacampur- campur bahasanya.  Pak uda-Pak Unjang di saru  om. Nuuda -we Dara disaru  tante. Lama-lama bahasa diri ba ahe koa bisa langit sabebet-sabebet. Lama-lama babahasa Indonesia. Arusnya bangga pane babahasa Kampokng pane babahasa Indonesia. Gagas agi kade pane manyak bahasa. 

Pasanan pun atakng. Dua galas esteh manis. Dua pingatn nasi campur. Pak Andon tatap maba Untuh ba bamang sanape makatn. 

Nang lain kade makatn langsung nana agi ba bamang. Pak Andon tatap ba bamang. Ia maba Untuh ba bamang doho sabape nyoapatn nasi ka molot. Ina mulih supe ka dangan memang koa dah kebiasaan. Nana mulih disosokatn iman diri' koa.

 Laka makstn Pak Andon masatn tiga bungkus mao di icakng ka Mantonyek. Ada bini man dua eko anaknya nana ampus. Tiap kali ada pamakanan nang dinamu man nyaman kadang nana dimakatn. Salalu diincakng pulakng. Namu ampahatn Ka uma balale lekoa uga. Pamakanan lea ikatn, manok, babotn dibungkus. Ia  ingat ka bini anaknya.

Ia badua pun bajalatn notok terminal. Ka terminal nunggu oto nang ka arah seluas. Ampeat dah jarakng oto. Urakng  dah ba taxi,  ba oto pribadi. Gagas-gagas agi otonya.  Ada uga nang ba fortuner, ba Lexuz. Nang ba oto koa udah pejabat ba sawit luas agi. Pak Adon nape ba oto, nape ba motor. Ia masih kodo. Ia ba arap dalamp ati anaknya ana idup barajaki. Ba arap Jubata mare paridupan nang edo, nang gagas. Ia salalu bakata kana anaknya " kita batiga ana jadi urakng kaya, pariduoatn  gagas"

Oto nang dinunggu-bunggu nape muok. Nang ada ka arah Singkawang, Sambas man tebas basosol-sosol .

 Abut ka terminal koa sisi angat. Nang bajual buah, nang bajual aii cocok atakng nawari ka Pak Andon man Untuh. Ia kakoa buke  urakng Dayak. 

Pak Andon ba pikir. Dua puluh tahutn nang dee ia badua bininya ampus ka pinyuh ampu toko, ampu tampat makatn nang bajual ka terminal Sobat man suku lain. Ia ba pikir Dayak ba kamaean. Baii bakaluasatn. Rasa-rasanya ia mao uga ba jual ka terminal  daripada motong raga  gatah murah. Ba uma nana sangahe asilnya. Aya modal dari asil. Kadang padi nang ditanam kalapet. Puso.

" Pak naun oto dah atakng Pak" Jakata Untuh ka Apa'nya. Pak Andon takajut. Ia menak naik oto mao pulakng ka Mantonyek. Ka Oto koa manyak urakng Jawa, urakng Timor. Dayak baka makan? Pasti naik motor, naik oto ka arah seluas. 

 

Oto bagarak ningalatn  terminal. Naap keba, lalu keba agi. Laka koa maraga lurus sampe ka Anjongan. Ka maraga keba  kanan urakng bajual buah nanas man madu puluh. Nang bajual buke Dayak. Tarutut oto nana sangahe kadangartn laju sidi. Tapi pikiran Pak Andon ka Udo. Antah masih ge ina motor  ka Simpang karasik naun.

(Basambung)