Suka Barubah-ubah
" Mao kamea kita we dara, alamp-alamp dah nguba bangkat" tanya Muntuh ka we dara Tarigas
" Mao nele uma mototn ba dah tiga ari nian nana diawasi" sahut we Tarigas
" Gajah ngahe me pake awasi agi, dipasangi SCTV ba biar aman " Jakata Muntuh agi.
" Mangga me we dara uma mototn mao dipasang CCTV kamae ngago arus listriknya. Mao sangahe buah nang mao di pasang luas uma sahektar labih. Panamuan nana sangahe mao pake pasang CCTV nyaman duit mali CCTV koa dijadiatn modal badagakng baras ada ga Untukng, baras mahal. Dee diri makatn tamora, makatn nasi jagong , makatn nasi bulgur. Lalubkade baras dicampur manggala dianggap kodo saranta zaman ORBA. Supe dangan makatn tamora ampeatn ari, giliran parut biasa makatn nasi , baras jadi mahal" Jakata We Tarigas.
" Aok baras mahal ampeatn. Heran sidi dari dee barubah kana barubah raga jukut. Ingat na dee sampat mahal gula, susu, gas, solar. Bidara jarikng jadi malhal uga padahal zaman are mae baraga nape agi dangan ka jaringan dinya" Jakata Muntuh
" Samua ka nagari diri nian nana ada nang abadi. Dari urusan pamakanan sampe ka dunia politik. Tele maan mahkamah konstitusi minta dipanjoat undang-Undang katantuatn ambang batas parlemen 4 persen nang balaku ka pemilu 2024 tapi tahun 2029, tapi calon wakil presiden bisa barubah man diubah. Nah ambang batas nian alasannya jutaan suara toa-toa nana bisa ngantat dangan jadi DPR, barubahnya Undang-undang koa pas sabanarnya manurut kakuasaan rakyat. Pokoknya samua kebijakan nana di pikiri sidi-sidi. Sangahe duit negara abis hanya manjoat undang-undang. Barubah kana barubah. Samuanya lekoa ka nagari diri nian tagantung sae nang mimpin,sae nang ba pangaruh. Pantas nana maju-maju ponok-ponok pikirannya. Tele Singapura nana ada ahe-ahe tapi bisa jadi negara maju. Ka nagari diri ahe maan ada tapi nana ba dampak. Nang ada bakalahi" Jakata we Tarigas.
Pas samak saka uma, Muntuh tatap lurus ka maraga aya mao ka KPU kacamatan bagago barita sae nang manyak namu suara nang nyalon DPRD kabupaten, provinsi man DPR-RI Pusat. We Tarigas maleo ka saka umanya. Nang lain ada nang bajalatn, ada nang ba motor notok umanya. Biar pun nguba' bangkat we Tarigas pintar me. Biar ka kampokng we Tarigas ba pikiran maju. Baii dangan aloki. Baii dangan pabaga. Baii dangan aloki.