Lempahe Unang-Dana Kampokng

Amutn  dah naik agi. Sinar matari udah mulaii narakngi tanah Mantonyek. Udo dah laka makatn. Alam nian ia ba ampahatn daukng menggala tutuk  campur pakatikng. Dah tiga kali ia nyasah kokotnya. Masih babau. Baunya bau tae  tapi selera makatn  nambah dinya.  Alamp nian dua pingatn nasi tama ka parutnya.

" Ngahe urakng nian nape bakaluasatn, jadi ge ini dah mao satangah lapan" Jakata udo bakata babaro sambil ia nele jam ka HPnya. 

Nana lama urakng ba kakaluaratn. Samua batarinak. Ada nang ba sandal ada nang nana. Ada nang megang cangkut ada nang megang sakop. Udo megang cangkut. Cangkutnya ba kayu aras  buliatn.  Batol kangkapm kade di pegang. Gagah sidi Udo kade ia megang cangkut koa sakalipun dageng  ka kokotnya  nape kateleatn.nape ba otot.

Samua bakalompok, sete kelompok sapuluh urakng. Batas-batasnya udah di  nantuaatn. Kateleatnya ari nian  parit koa bisa jadi untuk sabalah keba.  Sabalah kanan mungkin ampagi. 

" Karaja nang batol boh, nang dalamp nyangkut  tanahnya. Nang baya dibandong, dibandong boh"  Kata Sekdes saat ngalewati kelompok na Udo.

Dari ujukng  ka ujukng bunyi cangkut tama ka tanah. Dah lea ba musik  kadangaratnnya. Pokoknya samua karaja. Sete kalompok di mayar sajuta. Mayarnya pake anggaran Kampokng.  Ampeatn jadi kapala desa man pengurus desa udah nyaman. Basintak nyalon. Nang nana pane pun ikut nyalon kade dah pemilihan. Nana lea zaman are. Kapala kampoknh  man pengurus kampokng batol-batol pengabdian.  Ampeat  dah bagaji. Ada nang minjem doho duit untuk mayar administrasi. Antah ahe nang dingago. Jabatan ge , supaya di kanal ge atau duitnya. Bahkan ada nang ba bintis. Padahal nana mudah kade dah duduk. 

 Kabupaten mampawah, maraga umanya pun dimare samen . Ba motor dangan  ka uma. Sampe maraga patunuan pun  dimare samen. Walikota , camatnya langsung ngawasi mata anggaran. Nang  manjoat laporan nang nana basinunuh. Soalnya koa duit negara untuk kemajuatn  kampokng, supaya satiap kampokng  maju. Sejahtera penduduknya. Koa tujuan pamarentah mare duit samanyak koa.

Saat istirahat ka tampat nang dingin, udo lalu bakata"  coba diri etong ada lima balas kalompok. Baararti ada lima balas juta nang kaluar. Brarti masih ada satu milliar  seratus delapan puluh juta agi dana kampokng  diri, untuk ahe maan uwah sisanya"

" Ame badimao ba, dah namu proyek lalian diri dah puji Tuhan" sahut Pak Nape.

" Seluruh Indonesia nian ada kapala kampokng. Ada nang ngalukng ada nang nana. Nang ngalukng koa kapala kampokng nang jujur bisanya. Nang kiji-kiji  koa diri nauanlah. Ngahe ada nang Ngalukng, ia arus mutar otak. Anggaran memang leanya aya tapi program nang dipanjoat nana sabebet. Ada  nang nombok uga ditutupi nunggu anggaran nang ana" lanjut Pak Nape. 

" Tapi ba kade paretongannya edo nana nomboklah. Kapala desa nana karaja babaro ada teamnya. Nele Juknis saat mao manjoat program.  Kecuali kade asal manjoat, ujukng-ujung bisa jadi pangalit bajemaah. Bisa ditangkap me lea nang kapala kampokng  na jauh dari Kampokng diri" lanjut Udo.

" Koa batol. Makanya ada kapala kampokng  nang masok pinjara. Padahal ngalit duit koa buke ia babaro.  Nang senior-senior koa ba suka mendikte man mare cara nang nana banar. Samoga kapala desa diri edo karajanya" Jakata Pak Nape agi.

Nang lain hanya nangar Pak Nape man Udo baromong. Ia kakoa asik ngudut  rokok, ngopi man makatn lato mamggala. Menggala ka Mantonyek sidi badakah dari zaman are. Bajual dari zaman are  ka pasar karangan. Diubaii tiap alamp. Kampokng lain nana bajual lea urakng mantonyek. Edo pikiran urakng  nang bajual. Pane bagago duit. Sabanarnya otak urakng mantonyek pintar-pintar pane nele paso lempahe ada baduit.

" Kapala Kampokng  diri sampe ampeat edo karajanya. Makanya tapilih agi. Ku dangar kapala desa jabatannya jadi dipapanyakng, sambilan tahutn. Kade dua periode tapilih lapan balas tahun. Kade batol karajanya edo kampokng,  nana batol abis koa dana kampokng  ditalatn. Ka kecamatan diri ada seko kapala kampokng kana kasus hukum, koa tanda waspada" kata Udo. 

" Ame bahas nang koa ba, buke karaja diri. Nang penting diri namu uga ari nian, nana manyak sabebet " sahut Pak Gagas.

Kelompok na Udo pun lanjut bakaraja. Sambil ia nyangkut tanah manjoat parit, Udo mikiri adiknya Untuh nang minta ka Apa'man uwenya dibaliatn HP.