Lempahe Unang- ampus sosialisasi

Samua dangan dah bakomo ka bale desa. Ari nian ada sosialisasi salah satu calon nang mao jadi DPRD ka Landak. Ia buke dari partai terkenal. Tapi ia mao barusaha masok jadi anggota DPRD. Sae nauan tapilih.        

          

Udo pun dah basiap. Pas ari nian ari Minggu. Laka sambayang agi. Ia nana pake sipatu.  Ia make salob merek swallow. Silawarnya,  silawar Apa'nya. Pas cocok ka ia. Sabanarnya tulah, tapi kade dah na muat ka Apa'nya wajar ia pake. Bajunya pun ia make baju gatah, baju gatah nang lama.  Ia pun barangkat ka bale  desa.

" Koa isi doho daftar hadir tulis dama nang jelas boh. Tele nomor urut nya. Ngahe Apa' nana atakng ?" Kata panarima tamu ka Udo. 

Udo pun ngisi daftar hadir. Bale desa dah mulai panuh. Leleh paluh  dangan nang dah doho atakng. Nape agi ada tangis kamuda enek  uwenya maba ampus uga. Tapi nian gi bakanalatn jadi nape  nana kana aturan KPU. Udo duduk ka tangah. Ia nele ada karusi  nang kosong. Ka samaknya ada Pak udanya uga. 

" Urakng mae ia nauan pak uda" kata udo ka Pak Udanya.

" Masih Page diri uga ba, Apanya asal kampokng na ene, kade ia tapilih ana baya uga diri manjoat proposal untuk maraga uma diri " sahut Pak udanya.

" Ia naun dee kuliah ka Jawa.   Sampat karaja ka  kantor pengacara ka Pontianak naun. Janya ia kade jadi anggota DPRD Landak mao manjoat pendidikan  ka daerah diri maju" tambah Pak udanya.

" Pak uda nauan kamae ? Sahut Udo. 

"Soalnya nana mudah menepati janji kade dah tapilih. Kade ia tapilih partainya ana nampatatn  ka komisi mae. Aku nangar ka TV lea koa. Lanjut Udo. 

Patamuan pun dibuka. Ada kapala dusun(Kadus) ,ada Pak kepala desa(Kades), ada tokoh agama uga  ka bale desa koa. Samua udah namu giliran mare kata sambutan. Nian giliran Calon nang ngomong. 

" Tarima kasih boh ka  samua nang dah mao atakng, aku nian mao nyoba masok jadi anggota DPRD Landak. Damaku dah kaluar ka daftar pemilih tatap. Sae nauan kita mao dukung aku, nian saatnya diri bagarak basama. Aku nian garegetant  nele daerah diri masih nana maju-maju. Tarutama ka bidang pendidikan. Pendidikan koa ujung tombak parubahan. Maka koa ana aku minta dukungan kita samua. Pilih aku boh. Ingat nomor, pokoknya nang paling tarigas dari nang lain " Janya.

" Aku nana manyak bajanji boh. Ana kita akan nauan ka aku. Aku mao ngabdi ka Landak buke bagago duit boh. Asal kita nauan duitku  dah cukup. Ada sapuluh  dam sawitku ka seluruh kabupaten Landak. Ada dua puluh indomaretku. Ada tambang uga. Ada  usaha nang lain. Jadi pilih aku maan ana diri ngopi, bajonggan ka pondokku" sambung calon DPRD Landak.

Micropon  dah ba pindah kokot. " lempahe Page, jadi diri mao pilih sae, kade aku sarankan pilih nang duitnya manyak, pilih ia nian" kata nang ngincakng acara. 

"Nah nian dibuka tanya jawab, sae nang nang mao batanya angkat kokotnya. Aku batasi dua doho" tambahnya.

Udo nang dari tadi ngikuti lalu ngangkat kokotnya. Lalu mic udah dimare ka ia. 

" Tarima kasih aku mao batanya, manyak nang jadi DPRD nang  jadi DPRRI,  nang Jadi Bupati, jadi Wali kota, jadi Gubernur pada umumnya urakng baduit. Ngahe masih ada uga nang jadi pangalit. Duit untuk rakyat tatap dikalitnya. Nah kade kita tapilih ana jadi anggota DPRD Landak lempahe cara nana jadi pangalit,  ada anggota nang nana jadi pangalit duit, kita mao na ada ka anggota nang nana ngalit.  nian ja patanyaanku. Soalnya tahutn ana aku dah ada hak suara bisa milih" tanya Udo sekaligus ia mare nauan tentang dirinya nang dah bisa milih.

Nana lama-lama Pak tanyaan  udo pun langsung di jawab. 

" Patanyaannyu gagas sidi. Memang arus diakoi  selama nian dangan nele politisi koa, jabatan nang kao madah tadi  nana edo. Untuk koa aku mao masok supaya bisa ngubahnya. Kade manyak urakng baik nang jadi pasti edo. Tele pidato Kaesang saat ia jadi ketua partainya. Batol koa arus ada urakng baik nang manyak masok ka jabatan-jabatan strategis. Janya maan kita ana tele karajaku. Aku buka samua ka pemilihku termasuk gaji, tunjangan man nang lainnya. Aku ngincakng iman, kakuargaku, asal kampokngku, partaiku. Ka tampat karajaku ana kade tapilih ka kantor DPRD Landak " jawabnya.

 

Udo nana sangae puas nangar jawaban si Calon DPRD koa. Soalnya na di bare nauan cara supaya nana jadi pangalit  duit rakyat. 

Saat mao penutup team sukses maju mare pengumuman." Page waris samua ana bukatn dua ame lupa pilih Page diri nian boh. Nah saat pulakng ada nang kita tanda tangani. Nana manyak sabebet pasti namu lepetatn sekedar mali kopi gula. 

Sanape tanda tangan, Udo maju minta ba foto man minta nomor telepon calon DPRD tadi. Padahal ka Mantonyek dalamp susah sinyal. Tapi Udo nian urakngnya cerdas.

 Laka ba foto, sang calon mare kartu nama sambil ba kata" Udo nian kartu nama abang. Ahe-ahe antah hubungi aku boh. Kao anak muda nang potensial. Kade baya kao masok jadi team suksesku"

" Siap, tarima kasih boh, aku paramisi doho. Kade ada ba waktu singah ka rumah kami Bang ada na uwe karumah" sambil ia kaluar dari barisan untuk namui nang megang tanda tangan. 

Udo pun tanda tangan. Ia dimare amplop. Antah sangahe isinya. Nang jelas udah batamu man udah batanya. Ia nana supe. Batanya. Ia pun nana supe jawab kade ia ditanya. Ia bapikir samua diri manusia katalino nian sama. Kekurangan nana bisa jadi alasan diri jadi supe. Jadi urakng nang rendah diri. Udo  ba prinsip kade diri rendah diri nana namu ahe-ahe. Ditambah agi kade rendah diri sama uga menghina Jubata panampa Pajaji. Ia dah manjoat diri edo, gagas.

Sampe ka rumah amplop nang dinamu ka acara sosialisasi langsung dimare ka uwenya. " We nian tadi aku dimare dikabatnnya  antah sangahe. Sae nauan baya untuk mali gula kopi" 

Antah sangahe kali Udo ampus ka acara sosialisasi partai man para calon. Kadang ka mantonyek dalamp, kadang ka mantonyek luar, kadang ka karangan, kadang ka simpang, kadang ka Manyalitn. Setiap namu amplop ina paranah ia buka. Ia langsung bare ka uwenya. 

" Nian manyak sidi kao namu do, ada dua ratus ribu, pas baras diri udah abis. Baya mali Baras. Baras dah mahal me, sabantar agi ana kupapang kupik diri bagago baras. Kudangar susah baras ampeatn " Jakata uwenya. 

 " Syukurlah we samanyak koa duitnya. Tadi abang madah kade ahe-ahe antah ubungi ia, aku diminta bagabung man team suksesnya. Aku buke baii tapi nape waktunya. Kade nana bagabung nian nyangkut masa depanku uga we'a" 

" Tasarah kao Udo'a. Nang mae atinyu  nyaman, ikuti. Ame lupa dibamangi doho, diri nana nauan untuk masa nang ana. Jubata nang nauan pasti ia mao manto diri dalamp manjoat kaputusan " kata uweny agi. 

 Nana tarasa ari dah gumare, babotn dah mangka koekatn minta dibare makatn. Ati udo masih nana tanang antara narima atau nana  permintaan calon tadi . Sabantar -sabantar  ia tele kartu dama nang nyanarima tadi. Hanya ia nang dimare kartu dama dari nang atakng.  Alamat kantor ka Sunge Raya Pontianak, lengkap ba nomor WhattShap  man Emailnya. 

(Basambung)