Lempahe Unang-bagago sinyal
Nang lain tiap malam ampus ka Karangan ka warong nang ada Wifinya, tahan matanya nana tidur ba main game. Udo kade pun ampus sabulatn sekali koa pun ia bapadah doho ka urakng tuhanya. Minta ijin doho.Kade urakng tuha ngijinan baru ia ampus. Ia nele ayukngny nang gila ampus ba main game suka tidur ka sakolah. Gia guru beraatn. Ada agi nang nana bisa motong saat ari darakng.
Sumput sidi nele dangan. Nana ba pikir maju. Mata rusak, tidur nana nyatuk, duit kaluar mayar indomie, aii cocok. Jadi nana mampu nguasai diri. Nana mikiri ari nang ana. Tele maan kamuda ampeatn ari samua minta hp, nana ba sinyal pun nang penting ada hp. Nana ba kuota nang penting di irih, diincakng.
Bahkan tahan sampe tangah malam ka timawakng dirangit gigiti masih maan ba telepon, bakecoh-kecoh. Barayu-rayu. Mati me manyak nang bakanalatn ba urakng tuha. Nana gali tulah. Antah diahe. Nang penting repo. Repo nang nana batampus.
Ada agi ba Face book, nele instagram. Main tiktok, maca WathshApp, masih manyak agi. Lama-lama jadi pamalas. Kade disuruh bera. Di baba kauma pun baii. Koa karaja manyak kamuda ampeatn ari. Batol-batol dikuasai teknologi. Nana agi dipikiri nang penting ditele, dikomentari kadang namu video nang nana sinunuh. Ada kasus rompo taboyo jadi heboh namu kiriman dari daerah Samalantan naun. Nang nana pantas jadi dipantas-pantasi. Dah nana agi ba batas.
Udo man Usu pun naik ka Timawakng. Ampeatn dah ba sawit tampat koa. Dee bakabon gatah, ba bintawa, ba sarikatn, ba angkabakng.
Pindah ka kea pindah kanauan ia badua bagago sinyal. Ada sinyal ka layar kateleatn paling sabalok. Koa pun kadang jojonyap. Bageser agi. Manyak urakng atinya kasal. Gi batelepon tiba-tiba nana ba sinyal. Langit.
" Dian Ba dian Do, aku dah bisa muka FB dah nana ba putar-putar agi" kata Usu ka Udo
" Aok sabantar doho, aku gi ngaluararn hpku. Nyangkut nian ka kocekan. Baii ditarik" Sahut Udo. Udah lebih lima manit ia nyoba ngaluasatn hp koa. Satangah ba anto baru HPnya kaluar.
Udo pun nyamaki usu. Masih awas matanya noles nomor ka layar Hp. Lumayan ternyata ada dua balok sinyalnya. Agak ragu sabanarnya ia mao nelpon. Sampat ia bapikir lempaahe awal mao bakataa. Ia nana kanal. Tapi kade nana malam nian kamile agi. Kade nana dicoba penasaran uga. Ia pun notes nomor ka layar dua balas kali.
" Hallo Pak Uda, nian aku udo mantonyek. Ahe ga kabar pak uda" jakata Udo ka urakng nang nya nelpon.
" Aku Udo mao baromong ba kita Pak uda sabantar" lanjutnya
"Udo nang mae uwah, udo ka mantonyek koa manyak sidi, ada ampat ge lima urakng nang badama Odu, kao Udo nang mae" Tanyanya
" Aku ba Udo, nang ari koa batanya man kita mare kartu dama, ingat na Pak Uda" sahut Udo
" O aok, pak uda ingat ada ahe Do, ada nang bisa pak uda banto" jakata calon DPRD Landak koa
" Aku mao ba padahah ka Pak uda........ Tiba-tiba ilang koa sinyal.
Udo pun bageser, ba pindah ka kea kanauan tatap nana basinyal. Lama uga ia badua ba gagao sinyal sampe sajam lebih. Baarap bisa ada agi.
Boak pun dah mulai barenyah, tungkirik lekoa uga. Bulatn dah tarakng. Repo pokoknya nele abut. Tapi ati Udo jadi susah.
Nian nana lapas dari ahe nang ada ka Jakarta. Menterinya bakalit duit. Duit utk maedoii jaringan dingalit. Ayo galis para pejabat dibare tugas malah jadi pangalit.
Akhirnya ia badua turutn, pulakng. Ia badua baromong mao ba pakar ampagi ari sabtu mao ikut karaja bakti manjoat parit. Dee kade karaja bakti nana ba upah. Ada uga nang baupah gi jaman are karaja bakti namu balugur. Jakata urakng pamakanan kuda. Ampeatn karaja bakti namu dari dana kampokng nang samiliar lebih satahutn pamarentah mare duit ka kampokng-kampokng.
" lempahe manurut kao Su, dana kampokng koa. Sidi aya pamarentah mare ka kampokng-kampokng" tanya Udo ka Usu
" Ampagi maan diri baromong, ngomongan nang nian jukut" ia badua pun ba pisah