Lempahe Unang-Pahayaman

Koek babotn nang seko koa batol bising nangarnya. Mantang-mantang hanya seko. Ibarat kamuda sidi manja. Telat sabantar dah berisik maan. Udo ngangkat mangkanan dari toong. Masih ada sebuah agi nang tasisa. Gara-gara ember plastik ada toong  nana agi dipake. Toong koa dari kayu buliatn, antah sangahe bibis. Bolat dari babah sampe ka atas. Ka atasnya makin aya. Ka babahnya papan bolat jadi tomokng  toong. Lalu nang lea papatn koa tadi  dililit  pake uwi kadang pake kawat. Rongakngnya dibare damar  angkabakng. Udo make toong ngangkut mangkanan mare babotnya makatn. Sanape ditumpahatn ka dulakng, dulakng dinya marasehat  pake palapah  anyiur.  Baru lah ia numpahatn koa mangkanan. Langsung babotnnya ningkohob. Batol rangka koa babotn makatn baru anam bulatn dimihara ampeatn dah aya bangkat. Saat dingicakng dari Pak Kucing-Singkang aya'nya  aya janttukng.  

" Makatn boh kao babotn, ana Apa'ku mao ngago babotn  laki jadi lakinyu. Mao ngago ka Godak naun. Dinaun masih ada babotn. Ana kade ada babotn laki capat babuntikng capat baranak untuk adikku nang SD naun. Ia ginape babalak gara-gara nana ba babotn, capat aya kao boh " Udo bakata babaro sambil ia nungui  babotnnya koa.

 " Repo kita doa, ada dehe mihara babotn. Ka mantonyek nian kade diduitatn nang mati kana sarakatn koa bisa ratusan juta uga. Aya-aya bantut  dangan ba matiatn. Seko pun nana dimakatn. Antah ahe panyakitnya. Sampe ari nian nana tamu obatnya di pamarentah. Nana uga urakng namu pangare namu obat namu panangkalnya"  kata usu sambil ia notok Udo.

" Koalah pane ana kade tarus lalian diri pane unang lea urakng melayu bagawe munuh kambing" Udo nimpali kata-kata Usu tadi.

" Dono buke hanya bagawe munuh babotn,  upacara adat nang lain samua pake babotn.  Urakng mari misalnya harus munuh babotn. Masih manyak adat nang lainnya munuh babotn. Zaman are kade ada babotn  sambayang papukng munuh babotn. Makanya ana kade manyak agi babotn bisa repo agi musim bagawe batol na do" sambung Usu.

" Masalahnya kade manyak agi babotn ka diri nian barutus paha. Nana sanggup ampus ka samak rumah. Baceboran tahi babotn. Supe uga diri kade ada tamoe. Untungnya udah  bakakus  urakng. Dee kade mao beriha  pake kayu ngaga babotn. Gali disunakng dinya, arus bakandang" lanjut Udo.

" Aku nana satuju kade dikandangan agi babotn, selain baii aya, ciri diri bahwa  kampokng Dayak memang lekoa. Ada babotn lapas ada taenya" jakata Usu agi.

" Kao nian si mundur pikiran. Sama lea urakng tuha zaman are. Babotn  dilapasatn. Salain  baraaut ka abut sekitar rumah kade dah ujatn, nana diri bisa bakabon  ka samak rumah. Tele na melayu, na Jawa samak rumahnya ba tanami ampahatn, bakabon  bajual ia ka diri, nana ge supe tanah ka talibo rumah tapi diri mali ampahatn ka pasar karangan nauan, ka penjual ampahatn ka kampokng nian. Tele koa sisi rumah kami naun ampeatn dah baya mebet  cabe, mebet tarukng, man mebet daukng jangko  dee mae bisa. Abis dinyunakngi di babotn, coba kao pikiri Su" jakata udo agi.

Na sadar ari dah makin gumare. Pamakanan  babotn pun dah abis. Manok pun dah mangka kotek notok kandangnya. Sabantar agi tungkirik banyanyi. Ia badua bajanji mao naik ka Timawang malam ana bagago sinyal. Udo mao coba ngubungi calon DPR nang mare ia kartu dama. Sae nauan bisa diubungi.